వ్యవస్థాపక సంపాదకులు

దేవులపల్లి అమర్

ఎడిటర్

దేవులపల్లి అజయ్

జన విస్ఫోటనంపై ఆందోళన సరే..ఆరోగ్యంపై దృష్టి ?

August 22, 2019

‌ప్రధానమంత్రి నరేంద్రమోడీ దేశంలో జనవిస్ఫోటనం గురించి ఆందోళన చెందుతున్నారు. 2021 నాటికి ఈ సమస్యను అధిగమించాలని ఆయన స్వాతంత్య్ర దినోత్సవం సందర్భంగా దేశ ప్రజలకు ఇచ్చిన సందేశంలో పిలుపు ఇచ్చారు. ఇక్కడ ఒక విషయాన్ని మనం పరిశీలన జరపాలి. కుటుంబ నియంత్రణ పద్ధతులన్నీ మహిళలకేనా, పురుషులు పాటించాల్సిన అవసరం లేదా అన్న ప్రశ్న తలెత్తుతోంది. ప్రధానమంత్రి జనాభా విస్ఫోటనంపై ఆందోళన వ్యక్తం చేసారు కానీ, ఆరోగ్య సదుపాయాల విస్తరణపై ప్రభుత్వం దృష్టిని కేంద్రీకరించాలి. అంతేకాక, మహిళలను ఈ ఆపరేషన్లకు ప్రోత్సహకాల కోసమే ప్రోత్సహించడం సరైన పద్దతి కాదు. మహిళల ఆరోగ్యానికి అగ్ర ప్రాధాన్యం ఇవ్వాలి. దేశంలో జరుగుతున్న అభివృద్ధి సమ్మిళితం కావడం లేదనే దానిపై ఆందోళన చెందాలి. పిల్లల్ని కనడం మహిళల హక్కు. దానిపై దాడి చేయకూడదు.
జనాభా పెరుగుదల దేశ ఆర్థికాభివృద్ధికి పెనుసవాల్‌గా తయారైందని ప్రధాని తన స్వాతంత్య్ర దినోత్సవ ప్రసంగంలో స్పష్టం చేశారు. స్వతంత్ర భారత దేశంలో ప్రభుత్వం జన నియంత్రణ కోసం ప్రయత్నించడం ఇది మొదటి సారి కాదు. ఇదే విధమైన ఆందోళనలు వ్యక్తం కావడంతో 1951లో ఆనాటి ప్రభుత్వం కుటుంబ నియంత్రణ పథకాన్ని ప్రారంభించింది. ప్రభుత్వ ఆధ్వర్యంలో జన నియంత్రణ కార్యక్రమాన్ని ప్రపంచంలో మొదటగా భారత దేశమే ప్రారంభించింది. భారత దేశం అమలు జేస్తున్న కుటుంబ నియంత్రణ కార్యక్రమం ఎన్నో విమర్శలనూ, అవరోధాలనూ ఎదుర్కొంది. ఇప్పటికీ ఎదుర్కొంటోంది. ఎమర్జెన్సీ కాలంలో(1975-77)లో కుటుంబ నియంత్రణ శస్త్ర చికిత్సలు బలవంతంగా చేయించడం వల్ల కొన్ని చోట్ల మరణాలు సంభవించాయి. ప్రజల్లో వ్యతిరేకత వచ్చింది.
ఈ కార్యక్రమం గురించి మోడీ మాట్లాడుతూ జన విస్ఫోటనానికి మనం ఆందోళన చెందాలని అన్నారు. అయితే, గణాంకాల ప్రకారం చూస్తే అది సరికాదనిపిస్తుంది. ప్రపంచ వ్యాప్తంగ పరిశోధకులు టోటల్‌ ‌ఫెర్టిలిటీ రేట్‌ (‌టిఎఫ్‌ ఆర్‌)‌ని వార్షిక జనాభా పెరుగుదల రేటును జనాభా పెరుగుదల సంఖ్యను పరిశీలించి టిఎఫ్‌ఆర్‌ ‌రేటు 2-1 ఉండాలని నిర్ధారించారు. జాతీయ కుటుంబ ఆరోగ్య సర్వే ప్రకారం 2016లో భారత్‌లో టిఎఫ్‌ఆర్‌ 2.4 ఉం‌డగా, గ్రామీణ ప్రాంతాల్లో 2.4, పట్టణ రాంతాల్లో 1.8 ఉంది. దేశంలో 18 రాష్ట్రాలు, ఐదు కేంద్ర పాలిత ప్రాంతాలలో టిఎఫ్‌ఆర్‌ 2.1 ‌లేదా అంతకన్నా తక్కువ నమోదు అయింది 2017లో శాంపుల్‌ ‌రిజిస్ట్రేషన్‌ ‌సిస్టమ్‌ (ఎస్‌ఆర్‌ఎస్‌ ) ‌విడుదల చేసిన వివరాల ప్రకారం టిఎఫ్‌ఆర్‌ 2.2 ఉం‌ది. ఏడు రాష్ట్రాలు…. అసోం, బీహార్‌, ‌చత్తీస్‌ ‌గఢ్‌, ‌జార్ఖండ్‌, ‌మద్యప్రదేశ్‌, ‌రాజస్థాన్‌, ఉత్తరప్రదేస్‌ ‌లలో టిఎఫ్‌ఆర్‌ ‌జాతీయ సగటు కన్నా ఎక్కువ ఉంది.
2011 సెన్సెస్‌ ‌ప్రకారం 2010-11లో జనాభా పెరుగదల రేటు1.64 శాతం. ప్రపంచ బ్యాంకు వివరా ప్రకారం భారతలో జననాల రేటు తగ్గింది. 2001లో 1.73 శాతం ఉండగా, 2018లో 1.04 శాతం ఉంది. ఆర్థిక వ్యవహారాల శాఖ నిర్వహించిన 2018-19 ఆర్థిక సర్వే ప్రకారం 2011-16 మధ్య వార్షిక వృద్ధి రేటు1.3శాతం. పన్నెండు రాష్ట్రాల్లో జనాభా వృద్ధి రేటు ఒక శాతం కన్నా తక్కువ. బీహార్‌, ఉత్తరప్రదేశ్‌, ‌రాజస్థాన్‌, ‌హర్యానాలలో గతంలో జనాభా వృద్ధిలో ముందుండేవి. ఇప్పుడు ఆ రాష్ట్రాల్లో జనాభా వృద్ధి రేటు పడిపోయింది. 2021 నాటికి భారత్‌ ‌టిఎఫ్‌ఆర్‌ 2.1 ‌కి చేరుకోవచ్చు. భారత దేశంలో జనాభా వృద్ది రేటు బాగా తగ్గుతూ వస్తోందని వివిధ సర్వేలు స్పష్టం చేస్తున్నాయి.
జన నియంత్రణ, మహిళల సంతానోత్పత్తి హక్కు
మనది పురుషస్వామ్య వ్యవస్థ. సంతానోత్పత్తి బాధ్యత మహిళలదే. మహిళలకు ఇంటి పనుల బాధ్యతలే కాకుండా కుటుంబ వ్యవహారాలు చక్కదిద్దుకోవడం, సంతానాన్ని కనడం వంటి ఎన్నో బాధ్యతలు ఉన్నాయి. మన దేశంలో కుటుంబ నియంత్రణ శస్త్ర చికిత్సలు, ఇతర పద్దతుల భారాన్ని పూర్తిగా మహిళలపైనే మోపుతున్నారు. కుటుంబ నియంత్రణ నియమ నిబంధనలు మారాల్సిన అవసరం ఉంది. లింగ వివక్ష లేకుండా అందరూ పాటిస్తేనే కుటుంబ నియంత్రణ లక్ష్యం సాకారం అవుతుంది. మన దేశంలో భిన్న ప్రాంతాలు, మనస్తత్వాలు కలిగిన ప్రజలు ఉన్నారు. ఆచార, వ్యవహారాల పేరిట కుటుంబ నియంత్రణ పాటించేందుకు కొన్ని వర్గాలు ముందుకు రావు. 2015లో కుటుంబ నియంత్రణ పద్దతులను పాటించిన వివాహితుల శాతం 47.8 ఉంది. ట్యుబెక్టమీ శస్త్ర చికిత్సలు చేయించుకున్న మహిళల శాతం 88 ఉండగా, వేసక్టమీ ఆపరేషన్లు చేయించుకున్న వారిశాతం 12 మాత్రమే ఉంది. అసలు ఈ కార్యక్రమాన్ని మహిళల కోసమే రూపొందించినట్టుగా కనిపిస్తోంది. నేషనల్‌ ‌హెల్త్ ‌మిషన్‌ ‌ఫైనాన్షియల్‌ ‌మేనేజిమెంటు నివేదిక ప్రకారం 2016-17లో కుటుంబ నియంత్రణపై మొత్తం వ్యయం 577 కోట్లు. ఈ నిధులలో 85శాతాన్ని మహిళలకు ఆపరేషన్లపైనే ఖర్చు చేశారు. పురుషుల ఆపరేషన్లకు 2.8 శాతాన్ని మాత్రమే ఖర్చు చేశారు. ఈ కార్యక్రమ ప్రచారంలో ఎక్కువ మంది మహిళలే ఉంటున్నారు. పురుషులతో వారు కుటుంబ నియంత్రణ పద్దతుల గురించి స్వేచ్ఛగా మాట్లాడ లేరు. పురుషులకు నచ్చజెప్పి ఒప్పించలేరు. ఏడాదికి వారు తమకు నిర్దేశించిన లక్ష్యాల మేరకు కేసులు పూర్తి చేయడానికి ఆడవారిని శస్త్ర చికిత్సలకు ఒప్పిస్తున్నారు. పురుషుల కన్నా, స్త్రీలే ఎక్కువ మంది ఈ శస్త్ర చికిత్సలు చేయించుకోవడానికి ఇది ప్రధాన కారణం.
మన దేశంలో మహిళలకు బలవంతంగా కుటుంబ నియంత్రణ శస్త్ర చికిత్సలు చేయించిన సంఘటలు చాలా ఉన్నాయి. 2014 నవంబర్‌ ‌లో చత్తీస్‌ ‌గడ్‌ ‌బిలాస్‌ ‌పూర్‌లో పేద వర్గాలకు చెందిన మహిళలకు బలవంతంగా కుటుంబ నియంత్రణ శస్త్ర చికిత్సలు చేయించారు. 2010-13 మధ్య పేద వర్గాలకు చెందిన మహిళలకు ఈ శస్త్ర చికిత్సలు వికటించడంతో 363 మంది మహిళలు మరణించడంపై సుప్రీంకోర్టు ఆగ్రహాన్ని వ్యక్తం చేసింది. అప్పటి నుంచి ఈ ఆపరేషన్ల శిబిరాల నిర్వహణ బాగా తగ్గింది.
ప్రధానమంత్రి జనాభా విస్ఫోటనంపై ఆందోళన వ్యక్తం చేసారు కానీ, ఆరోగ్య సదుపాయాల విస్తరణపై ప్రభుత్వం దృష్టిని కేంద్రీకరించాలి. అంతేకాక, మహిళలను ఈ ఆపరేషన్లకు ప్రోత్సహకాల కోసమే ప్రోత్సహించడం సరైన పద్దతి కాదు. మహిళల ఆరోగ్యానికి అగ్ర ప్రాధాన్యం ఇవ్వాలి. దేశంలో జరుగుతున్న అభివృద్ధి సమ్మిళితం కావడం లేదనే దానిపై ఆందోళన చెందాలి. పిల్లల్ని కనడం మహిళల హక్కు. దానిపై దాడి చేయకూడదు.