- సిన్హా లాంటి వ్యక్తి గెలిస్తే దేశ ప్రతిష్ఠ మరింత పెరుగుతుంది
- ఆత్మ బ్రోధానుసారం వోటేయాలి
- యశ్వంత్‌ సిన్హాకు మద్ధతుగా టిఆర్‌ఎస్‌ సభలో సిఎం కెసిఆర్‌
హైదరాబాద్‌, ప్రజాతంత్ర, జూలై 02 : మంచితనం, నిజాయితీతో కూడిన వ్యక్తి యశ్వంత్‌ సిన్హా అని ముఖ్యమంత్రి కేసీఆర్‌ అన్నారు. యశ్వంత్‌ సిన్హా గెలుస్తారన్న నమ్మకం తనకు ఉందని ధీమా వ్యక్తం చేశారు. శనివారం యశ్వంత్‌ సిన్హాకు మద్దతుగా జలవిహార్‌లో టిఆర్‌ఎస్‌ నిర్వహించిన సభలో సిఎం కెసిఆర్‌ మాట్లాడుతూ…అన్ని రంగాల్లో యశ్వంత్‌కు విశేష అనుభవం ఉందన్నారు. ఇప్పటికే దేశానికి అత్యుత్తమ సేవలు అందించారని కొనియాడారు. ఆర్థిక, విదేశాల మంత్రిగా చేసిన అనుభవం ఉందన్నారు. ఆత్మప్రబోధానుసారం వోటు వేయాలని కోరారు. సిన్హా లాంటి వ్యక్తి గెలిస్తే దేశ ప్రతిష్ఠ మరింత పెరుగుతుందని సీఎం చెప్పుకొచ్చారు.
రాష్ట్రపతిగా మంచి వ్యక్తిని ఎన్నుకోవాల్సిన అవసరం ఉందని, భారత రాజకీయాల్లో యశ్వంత్‌ సిన్హా గొప్ప వ్యక్తి అని కెసిఆర్‌ పేర్కొన్నారు. యశ్వంత్‌ సిన్హాకు తెలంగాణ ప్రజలు, ప్రభుత్వం తరపున హైదరాబాద్‌కు స్వాగతం పలుకుతూ భారత రాజకీయాల్లో యశ్వంత్‌సిన్హా గొప్ప వ్యక్తి. న్యాయవాదిగా ఆయన తన ప్రస్థానం మొదలుపెట్టి..అధికారిగా ఆపై రాజకీయ వేత్తగా ఎదిగారు. అధికారిగా, రాజనీతిజ్ఞుడిగా తనను తాను నిరూపించుకున్నారు. తన పనితీరుతో అంతర్జాతీయ స్థాయిలో అవార్డులు అందుకున్నారు. దేశంలో గుణాత్మక మార్పు రావాల్సిన అవసరం ఉంది. అందుకే.. పార్లమెంటేరియన్లంతా ఆత్మ ప్రభోదానుసారం యశ్వంత్‌ సిన్హాకు వోటేయాలని విజ్ఞప్తి చేశారు సీఎం కేసీఆర్‌. రాష్ట్రపతి అభ్యర్థిగా యశ్వంత్‌ లాంటి మంచి నేతను ఎన్నుకోవడం అదృష్టం. సమున్నత వ్యక్తిత్వం ఉన్న యశ్వంత్‌ సిన్హా గెలుస్తారనే నమ్మకం ఉంది. ఆయన గెలవాలని మనసారా కోరుకుంటున్నట్లు.. తద్వారా దేశ గౌరవం రెట్టింపు అవుతుందని పేర్కొన్నారు. ఈ కార్యక్రమంలో మంత్రులు, ఎంపిలు, ఎమమెల్యేలు తదితరులు పాల్గొన్నారు.
