ఆం‌దోళన వద్దు, అప్రమత్తంగా ఉందాం..

 వివిధ రాష్ట్రాల్లో కొరోనా కేసులు పెరుగుతున్న నేపథ్యంలో వైద్యారోగ్య శాఖ అప్రమత్తంగా ఉండాలని వైద్యారోగ్య శౄఖ మంత్రి హరీష్‌ ‌రావు సూచించారు. ప్రజలు ఆందోళన చెందాల్సిన అవసరం లేదని, అయితే అప్రమత్తంగా ఉండాల్సి ఉంటుందని ఆయన చెప్పారు. దగ్గు, జ్వరం, గొంతు నొప్పి వంటి కొవిడ్‌ ‌లక్షణాలు ఉన్న వారు సమీపంలోని ప్రభుత్వ ఆరోగ్య కేంద్రాల వద్దకు వెళ్లి పరీక్షలు చేయించుకొని, అవసరమైన వారు చికిత్స పొందాలని సూచించారు. నూతన వేరియంట్లతో పలు దేశాలు, రాష్ట్రాల్లో కొరోనా కేసులు పెరుగుదల నేపథ్యంలో రాష్ట్ర ఆర్థిక, వైద్యారోగ్య శాఖ మంత్రి హరీష్‌ ‌రావు వైద్యాధికారులతో శుక్రవారం ఉన్నత స్థాయి సమీక్ష నిర్వహించారు. రాష్ట్రంలో కొరోనా పరిస్థితుల గురించి అన్ని విభాగాల వైద్యాధికారులతో చర్చించి, పలు సూచనలు, ఆదేశాలు జారీ చేశారు.  కోవిడ్‌ ‌వ్యాక్సినేషన్లో తెలంగాణ దేశానికి ఆదర్శవంతంగా నిలిచిందని, ముఖ్యంగా ప్రికాషన్‌ ‌డోసు పంపిణీ చేయడంలో మొదటి స్థానంలో ఉందని గుర్తు చేశారు. ఇప్పటి వరకు 7.75 కోట్ల టీకాలను అర్హులైన వారికి అందించడం జరిగిందన్నారు. 1.35 కోట్ల ప్రికాషన్‌ ‌డోసులు పంపిణీ చేయగా, 1.62 కోట్ల ప్రికాషన్‌ ‌డోసు పంపిణీ చేయాల్సి ఉందన్నారు. కోవిడ్‌ ‌నుంచి తమను తాము రక్షించుకోవడంలో భాగంగా అర్హులైన ప్రతి ఒక్కరూ టీకాలు తీసుకోవాలని విజ్ఞప్తి చేశారు. అన్ని పిహెచ్సీలు, యూపీహెచ్సీల్లో టీకాలు అందుబాటులో ఉండేలా అవసరమైన చర్యలు తీసుకోవాలని అధికారులను ఆదేశించారు. అవసరానికి సరిపడా కేంద్రం డోసులు సరఫరా చేయని నేపథ్యంలో, పెరుగుతున్న కేసుల దృష్ట్యా మరిన్ని డోసులు ఇవ్వాలని కేంద్రానికి లేఖ ద్వారా విజ్ఞప్తి చేయాలని అధికారులను ఆదేశించారు. ఆరోగ్య కేంద్రాల్లో కోవిడ్‌ ‌పరీక్షలు చేసేలా ఏర్పాట్లు చేయాలన్నారు. బీపీ, షుగర్‌, ‌కిడ్నీ సమస్యలు, కేన్సర్‌ ‌వంటి దీర్ఘకాలిక రోగాలతో బాధపడుతున్నవారు జాగ్రత్తగా ఉండాలని సూచించారు. ప్రభుత్వం పూర్తి స్థాయిలో సన్నద్ధంగా ఉందని, ముందస్తు జాగ్రత్తల్లో భాగంగా అర్హులైన వారు తమ వంతుగా టీకా తీసుకోవాలని విజ్ఞప్తి చేశారు. జూమ్‌ ‌ద్వారా జరిగిన సమీక్షలో హెల్త్ ‌సెక్రెటరీ రిజ్వీ, కుటుంబ సంక్షేమ విభాగం కమిషనర్‌ ‌శ్వేత మహంతి, డీఎంఇ రమేష్‌ ‌రెడ్డి, డీహెచ్‌ ‌శ్రీనివాస రావు, టీవీవీపీ కమిషనర్‌ అజయ్‌ ‌కుమార్‌, ‌గాంధీ హాస్పిటల్‌ ‌సూపరింటెండెంట్‌ ‌రాజారావు తదితరులు పాల్గొన్నారు.