మేడ్చల్, ప్రజాతంత్ర, సెప్టెంబర్ 06 : మేడ్చల్ మల్కాజిగిరి జిల్లాలోని నిజాంపేట మున్సిపల్ కార్పొరేషన్ పరిధిలో ఉన్న విష్ణుప్రియనగర్లో మున్సిపల్ అధికారుల ముందస్తు అనుమతి లేకుండా వరద నీటిని దారి మల్లించేందుకు గుర్తు తెలియని వ్యక్తులు నాలా పై కప్పు తెరిచి ఉంచడంతో నాలుగేళ్ళ బాలుడు తేజస్ మిథున్రెడ్డి మృతి చెందిన విషయం తెలిసిందే. అందుకు సంబంధించిన వారిపై పోలీసులు చట్టరీత్యా చర్యలు తీసుకోవాలని జిల్లా అదనపు కలెక్టర్ అభిషేక్ అగస్త్య బుధవారం ఒక ప్రకటనలో తెలిపారు. విష్ణుప్రియనగర్లోని తుర్క చెరువుకు అనుసంధానంగా ఉన్న నాలా పైకప్పును ఈనెల 5వ తేదీన వరద ఉదృత్తిని మళ్ళించేందుకు తెరిచి ఉంచడం వల్లే పైకప్పు దాటేందుకు తేజస్ మిథున్ రెడ్డి వెళ్ళగా అక్కడ నాలా తెరిచి ఉండటం వల్ల అందులో కొట్టుకుపోయి బాలుడు మృతి చెందారని అధికారులు, బాలుని తల్లిదండ్రులు తెలిపిన మేరకు అందుకు సంబంధించిన బాధ్యులను గుర్తించి పట్టుకొని వారిపై, అపార్టుమెంట్పై కేసు నమోదు చేయాల్సిందిగా ఎఫ్ఐఆర్ చేయాల్సిందిగా బాచుపల్లి స్టేషన్ హౌస్ ఆఫీసర్ (ఎస్హెచ్వో)కు జిల్లా అదనపు కలెక్టర్ అభిషేక్ అగస్త్య ఆదేశించారు. ఈ విషయంలో మృతుడు నాలుగేళ్ళ తేజస్ మిథున్రెడ్డి తల్లిదండ్రులకు, కుటుంబసభ్యులకు తన సంతాపం తెలిపారు.
