ఎందరో అమరుల ప్రాణత్యాగం
మరెందరో యోధుల పోరుఫలం
వెరసి దేశ స్వతంత్రం సంప్రాప్తం
ఈ చారిత్రాత్మక సందర్భంలో
భారత స్వాతంత్ర ద్విసప్తాహ
వజ్రోత్సవం విధిగా జరుపుదాం
అదేరీతిగా సమీక్ష చేసుకుందాం
నేటికి ప్రజాస్వామ్య భారతంలో
ఆశయ బీజాలు అంకురించలేదు
ప్రగతి ఫలాలు పరిపక్వం కాలేదు
సమైక్య సుమాలు అరివిరియలేదు
స్వేచ్ఛ గాలులు వీచలేదు సరికదా!
ఇంకా మోడుబారుతున్న తరుణం
సర్వసత్తాక గణతంత్ర దేశంలో
అజ్ఞాన తిమిరాలు తొలగలేదు
దుర్భర దారిద్య్రం కడతేరలేదు
కులమతాల చిచ్చు చల్లారలేదు
దోపిడీ పాలనకు కాలం చెల్లలేదు
పైపెచ్చు హెచ్చుమీరుతున్న వైనం
ఏతావాత నిగ్గు తేలేదేమంటే
స్వతంత్ర భారతచరిత్ర సమస్తం
నల్లవాడి పీడన పరాయణత్వం
ఓయి భారతీయ జనగణమా !
ఎగిరే మువ్వన్నెల జెండా సాక్షిగా
ఇకనైనా పెను నిద్దుర విదిలిద్దాం
దోపిడీ మూకల భరతం పడదాం
మతోన్మాద శక్తుల తుదముట్టిద్దాం
ఆధిపత్య కోటల బీటలుబారుద్దాం
నిరంకుశ పాలకుల తరిమికొడదాం
నవభారత నిర్మాణానికి ఉపక్రమిద్దాం
సమైక్య గీతికల్ని గళమెత్తి పల్లవిద్దాం
(భారత స్వతంత్ర వజ్రోత్సవవేళా జాతి మేల్కొల్పుగా..)
– కోడిగూటి తిరుపతి,9573929493
