గెలిపిస్తే అభివృద్ధి  ఏంటో చూపిస్తా

ఖమ్మం టౌన్, ప్రజాతంత్ర, అక్టోబర్ 29 :

ఒక్కసారి ఎమ్మెల్యే అయితే చాలు అంతటితో ఆగిపోదాం అనుకునే మనస్తత్వం మీ శీనన్నది కాదు.  వోట్లేసి గెలిపించిన ప్రజలను అట్టిపెట్టుకొని. ఇచ్చిన హామీలను నెరవేర్చాకే మళ్లీ మీ మధ్యకు వస్తాను ” అని కాంగ్రెస్ పాలేరు నియోజకవర్గం అభ్యర్థి పొంగులేటి శ్రీనివాసరెడ్డి మాటిచ్చారు. ఖమ్మం రూరల్ మండలం కరుణగిరి సమీపంలోని ఫోర్త్ క్లాస్ ఎంప్లాయిస్ కాలనీలో ఆదివారం ఏర్పాటు చేసిన ఆత్మీయ సమ్మేళనంలో ఆయన ప్రసంగించారు. 20 ఏళ్ల క్రితం ఏర్పడిన నాలుగో తరగతి ఉద్యోగుల కాలనీలో మౌలిక సదుపాయాలు కూడా లేవని, స్థానిక ఎమ్మెల్యేకు మొరపెట్టుకున్నా ప్రయోజనం లేకుండా పోయిందని కాలనీవాసులు పొంగులేటి దృష్టికి తీసుకువచ్చారు. మొన్నటి మున్నేరు వరద ముంపుతో తాము పడిన ఇబ్బందులను ఏకరువు పెట్టారు. దీనిపై స్పందించిన పొంగులేటి రాబోయేది ఇందిరమ్మ రాజ్యమని,  కాంగ్రెస్ ప్రభుత్వం అధికారంలోకి వస్తుందని, మీ అందరి ఆశీర్వాదంతో  పాలేరు ఎమ్మెల్యేగా ఎన్నికవుతా అన్నారు. డిసెంబర్లోనే కాంగ్రెస్ పార్టీ అధికారంలోకి వస్తుందన్నారు. వెంటనే జనవరిలోనే ఆర్సీసీవాల్ నిర్మాణం చేపడుతామన్నారు.  ఖమ్మం శివారులో గత ప్రభుత్వం నిర్మించిన చెక్ డ్యాం కారణంగానే మున్నేరు ముంపు తీవ్రత అధికంగా ఉందన్నారు. ఖమ్మం శివారు వరకు మున్నేరుపై ఎక్కడ చెక్ డాములు లేకుండా, బ్యాక్ వాటర్ పోటెత్తకుండా ఆర్సీసీ వాల్ నిర్మాణం చేపడతామని అన్నారు. ఖమ్మం నగరానికి ఆనుకొని ఉన్నా కనీస వసతులకు కూడా నోచుకోకుండా ఉన్న నాలుగో తరగతి ఉద్యోగుల కాలనీలో తాను ఎమ్మెల్యేగా బాధ్యతలు చేపట్టిన వెంటనే సీసీ రోడ్ల నిర్మాణం, డ్రైనేజీల ఏర్పాటు, తదితర సౌకర్యాలు మెరుగుపరుస్తానని హామీ ఇచ్చారు. ఈ ఒక్కసారి ఎమ్మెల్యే అయ్యి ఆగిపోవాలని తాను అనుకోవడం లేదని, ప్రజాసేవ చేసుకునే వయసు తనకెంతో ఉందని అందుకే మరో మారు మిమ్మల్ని ఓటు అడగాల్సి వస్తే.. ఇచ్చిన హామీలు నెరవేర్చాకేనన్నారు. బీఆర్ఎస్ కు వోటేస్తే బిజెపికి వోటేసినట్లే అని అన్ని కుల, మతాలకు సమ్మిళితంగా ఉన్న నాలుగో తరగతి ఉద్యోగుల కాలనీ వాసులకు విజ్ఞప్తి చేశారు. కాంగ్రెస్ ను మించిన లౌకిక పార్టీ మరొకటి లేదనే విషయాన్ని గుర్తెరిగి వోటేయాల్సిందిగా విజ్ఞప్తి చేశారు. స్థానిక పాస్టర్ అనిల్ కుమార్ ఆధ్వర్యంలో క్రైస్తవ సోదరులు పొంగులేటి శ్రీనివాసరెడ్డి విజయాన్ని, రాష్ట్రంలో కాంగ్రెస్ మెజార్టీ స్థానాలు సాధించాలని కాంక్షిస్తూ ప్రార్థన చేశారు. ఈ సమ్మేళనంలో కాంగ్రెస్ పార్టీ రాష్ట్ర నాయకులు రాయల నాగేశ్వరరావు, మద్దినేని బేబీ స్వర్ణకుమారి తదితరులు మాట్లాడారు. ఫోర్త్ క్లాస్ ఎంప్లాయిస్ కాలనీ వాసులంతా పొంగులేటి కి మద్దతు తెలియజేశారు.