ఆమనగల్లు, ప్రజాతంత్ర ఆగస్ట్ 25 : హైదరాబాద్ – శ్రీశైలం జాతీయ రహదారిపై మేడిగడ్డ తాండ సమీపంలో శుక్రవారం మధ్యాహ్నం టిప్పర్ ఢీకొన్న సంఘటనలో ద్విచక్ర వాహనంపై వెళ్తున్న ఇద్దరు యువకులు దుర్మరణం చెందారు. దీనికి సంబంధించి ఆమనగల్ ఎస్సై బలరాం నాయక్ తెలిపిన వివరాలు ఇలా ఉన్నాయి. ఆమునగల్ మున్సిపాలిటీలోని గుర్రం గుట్ట కాలనికి చెందిన శేఖర్ (20) చరణ్ (36) అనే యువకులు ద్విచక్ర వాహనంపై ఆమనగల్లు నుండి అచ్చంపేటకు వెళుతుండగా కల్వకుర్తి నుండి హైదరాబాద్ వెళుతున్న టిప్పర్ డ్రైవర్ అతివేగంగా అజాగ్రత్తతో బైక్ ను ఢీకొనడంతో అక్కడికక్కడే ఇద్దరు యువకులు మృతి చెందినట్లు ఎస్సై తెలిపారు. మృతుల బంధువు గుగ్గిళ్ళ కృష్ణమ్మ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు. మృతదేహాలను పోస్టుమార్టం నిమిత్తం కల్వకుర్తి ప్రభుత్వ ఆసుపత్రికి తరలించినట్టు ఆయన వివరించారు.
