అం‌బేద్కర్‌ ‌విశ్వమానవుడు

హైదరాబాద్‌, ‌ప్రజాతంత్ర, ఏప్రిల్‌ 14 : ‌డా బిఆర్‌ అం‌బేద్కర్‌ ‌రచించిన రాజ్యాంగం 75 సంవత్సరాలు పూర్తి చేసుకున్నా…ఇప్పటికీ అంబేద్కర్‌ ‌జయంతులు చేసుకుంటూ పోవడమేనా? ఆయన చెప్పింది  ఏమైనా ఆచరించేది ఉందా? ఆ దిశగా ఏమన్నా కార్యాచరణ ఉందా, లేదా? అని మనందరం గుండెలమీద చెయ్యేసుకొని ఆలోచించుకోవాలని సిఎం కెసిఆర్‌ ఉద్ఘాటించారు. ఇప్పుడు భారతదేశం ప్రశ్నించుకోవాల్సిన అవసరం ఉందని, ఇంకా ఆటలు, పాటలే కాదు.. కార్యాచరణ ప్రారంభం కావాలని, ఒక ఆచరణాత్మకమైనటువంటి ప్రారంభోత్సవం కావాలని సిఎం పిలుపునిచ్చారు. శుక్రవారం అంబేద్కర్‌ 132‌వ జయంతి సందర్భంగా 125 అడుగుల అతి పెద్ద అంబేద్కర్‌ ‌విగ్రహం ఆవిష్కరణ అనంతరం ఏర్పాటు చేసిన సభలో సిఎం మీట్లాడుతూ…అంబేద్కర్‌ ‌విగ్రహాన్ని ఎవరో డిమాండ్‌ ‌చేస్తేనో, చెబితేనో ఏర్పాటు చేసుకోలేదని, అద్భుతమైనటువంటి విశ్వమానవుని విశ్వరూపాన్ని, ఈ మూర్తి రూపాన్ని మనమిక్కడ ప్రతిష్టించుకున్నామంటే దానిలో ఒక బలమైన సందేశం ఉందనా తెలిపారు. ఈ ప్రదేశం ఒక సుందర దృశ్యమే కాకుండా రాష్ట్ర పరిపాలనా సౌధమైనటువంటి సెక్రటేరియట్‌ ‌పక్కనే ఉంది. మన పరిపాలనా సౌధానికి కూడా అంబేద్కర్‌ ‌పేరే పెట్టుకున్నాం. సెక్రటేరియట్‌ ‌ముందే అమరుల స్మారకం కూడా ఉంది. అ పక్కనే హుస్సేస్‌ ‌సాగర్‌ ‌మధ్యలో అంబేద్కర్‌ ‌నమ్మిన బుద్ధ విగ్రహం ఉంది. ఇవన్నీ ఒక అద్భుతమైనటువంటి సందేశాత్మకమైనటువంటి చిహ్నాలు. అంబేద్కర్‌ ‌విగ్రహం, అమరవీరుల స్థూపం, శాంతిమూర్తి బుద్ధుడిని ప్రతిరోజూ సెక్రటేరియట్‌కు వొచ్చే ముఖ్యమంత్రి, మంత్రులు, సెక్రటరీలకు ఎప్పటికప్పుడు ఆయన సిద్ధాంతం ఆలోచనల్లోకి వొస్తూ ఉండాలె. అంబేద్కర్‌ను చూస్తూ వాళ్ల మనసు ప్రభావితం కావాలని సిఎం తెలిపారు.

ఆయన మార్గం పట్టాలని, ఆయన అనునిత్యం కలలో మెరవాలని, తమ జీవితాలను అర్పించి సాధించిన తెలంగాణ అమరులు ఆదర్శం కావాలనే విధంగా మనం రూపకల్పన చేసుకోవడం జరిగింది. ఇది విగ్రహం కాదు.. ఒక విప్లవం. ఇది కేవలం ఆకారానికి ప్రతీక కాదు, తెలంగాణ కలల సాకారానికి ఒక చైతన్య దీపిక అని మంత్రి హరీష్‌ ‌రావు చెప్పడం జరిగింది. ఆ పద్ధతిలో దీనిని మనం ఆవిష్కరించుకోవడం జరిగింది. ఈ విగ్రహం ఏర్పాటు చేయడానికి ఆహోరాత్రులు కృషి చేసినటువంటి ఎస్సీ సంక్షేమ శాఖ మంత్రి కొప్పుల ఈశ్వర్‌, అం‌తకుముందు ప్రారంభంలో ప్రయత్నించిన కడియం శ్రీహరి, దానికి కొనసాగింపుగా కొప్పుల ఈశ్వర్‌  ‌దేశదేశాలు తిరిగి కృషి చేశారని సిఎం వారికి అభినందనలు తెలిపారు. దీని నిర్మాణం కృషి చేసిన ప్రతి ఒక్కరికి తన పక్షాన, రాష్ట్ర ప్రభుత్వం పక్షాన సిఎం ధన్యవాదాలు, కృతజ్జ్ఞతలు తెలియజేశారు. డాక్టర్‌ ‌బి.ఆర్‌.అం‌బేద్కర్‌ ‌పేరిట రాష్ట్ర ప్రభుత్వం ఒక శాశ్వత అవార్డును ఇవ్వాలని దళిత మేధావి కత్తి పద్మారావు పత్రికా ముఖంగా ఒక సూచన చేశారు. రాష్ట్ర పభుత్వం అంబేద్కర్‌ ‌పేరిట ఒక అవార్డును ఇవ్వనున్నట్లు తక్షణమే ప్రకటిస్తున్నాను. వెంటనే ఆదేశాలు ఇస్తాం. రూ.51 కోట్లను డిపాజిట్‌ ‌చేసి, దాని ద్వారా వొచ్చిన వడ్డీ దాదాపు రూ.3 కోట్లతో దేశంలో, రాష్ట్రంలో ఉత్తమ సేవలు అందించినవారికి అంబేద్కర్‌ ‌పేరిట ప్రతి జయంతి రోజు అవార్డులను అందివ్వడం జరుగుతుందని కెసిఆర్‌ ‌తెలిపారు.

 70 ఎండ్ల క్రితం రాజ్యాంగం అమలు ప్రారంభమై, అనేక పార్టీలు గెలవడం, ఓడటం, ప్రభుత్వాలు మార్పు జరిగినా..కశ్మీర్‌ ‌నుంచి కన్యాకుమారి వరకు నేటివరకూ నిరుపేదలు ఎవరంటే దళితులు అనే మాట ఉండటం మనందరికి కూడా సిగ్గుచేటు. ఈ పరిస్థితి మారాలి. పార్టీలు ఓడిపోవటం, వేరే పార్టీలు గెలవడం కాదు. ఈ దేశంలో ప్రజలు గెలిచేటటువంటి రాజకీయం రావాలి. దానికోసం దళిత మేధావి వర్గం కూడా ఆలోచన చేయాలి. అన్నం ఉడికిందా? లేదా? అని కుండ మొత్తం చూడాల్సిన పనిలేదు. రెండు మూడు మెతుకులు చూస్తే చాలు. ఎవరి వైఖరి ఏ విధంగా ఉంది.. ఏ డైరెక్షన్‌ ‌లో పనిచేస్తా ఉన్నరు.. ఇక్కడ బీఆర్‌ఎస్‌ ‌ప్రభుత్వం ఏవిధంగా పనిచేస్తా ఉన్నదో ఆలోచించాలి. టీఆర్‌ఎస్‌ ‌పార్టీ రావడానికి ముందు ఇక్కడ పది సంవత్సరాలు వేరే పార్టీ రాజ్యం చేసింది. వాళ్ల పది సంవత్సరాల కాలంలో దళితుల అభివృద్ధి కోసం వాళ్లు పెట్టిన ఖర్చు కేవలం రూ.16వేల కోట్ల రూపాయలు. టీఆర్‌ఎస్‌ ‌ప్రభుత్వం వొచ్చింతర్వాత ఈ పది సంవత్సరాలలో దళితుల అభివృద్ధి కోసం ఖర్చు పెట్టిన మొత్తం రూ.1,25,062 కోట్లని, ఇవి కాగ్‌ ‌నిర్ధారించిన విషయాలేనని సెం కెసిఆర్‌ ‌తెలిపారు. భారత దేశంలోనే కాదు ప్రపంచంలోనే ఒక గొప్ప పనిని సాధించే కార్యక్రమం, దళితుల అభివృద్ధికి దోహదపడే కార్యక్రమం దళిత బంధు కూడా తెలంగాణ ప్రభుత్వం తెచ్చిందని అన్నారు. డాక్టర్‌ ‌బి.ఆర్‌.అం‌బేద్కర్‌ ‌పేరు పెట్టుకున్న రాష్ట్ర ప్రధాన కార్యాలయం సచివాలయాన్ని ఈ నెల 30న ప్రారంభం చేసుకోబోతున్నామని తెలిపారు.

వీటన్నింటినీ మించి శిఖరాయమానంగా ఆకాశమంత ఎత్తు ఉండేటటువంటి, మనందరికి మార్గదర్శనం చేసేటటువంటి ప్రపంచంలోనే కాదు..ఇండియాలోనే కాదు..ఎక్కడ కూడా లేనంత ఎత్తైనటువంటి మహోన్నత విగ్రహంను ప్రతిష్టించుకున్న ఘనత కూడా మన తెలంగాణ రాష్ట్రానికి, తెలంగాణ ప్రభుత్వానికే దక్కిందని తెలిపారు.  అనేక పార్టీలు కొలాహలాలు, గందరగోళాలు చేస్తుంటారు. కానీ వాస్తవ దృక్పథం వైపు ప్రయాణం దళిత బిడ్డలందరూ కొనసాగించే విధంగా దళిత మేధావి వర్గం ఆలోచించాలె. అందుకు సమాయత్తం కావాలని కూడా తాను మనవి చేస్తున్నాన్నారు. నిజంగా పనిచేసేవాళ్లను ప్రోత్సహిస్తూ ముందుకు మరింత అభివృద్ధి సాధించే అవకాశం ఉంటది. కొన్ని విషయాలు చెప్పడానికి ఆత్మ విశ్వాసం కావాలి. గతంలో నేను చెప్పిన. నేను ఆంధప్రదేశ్‌ ‌రాష్ట్రం నుంచి దిల్లీ వెళ్తా ఉన్నా.. మళ్లీ తెలంగాణ రాష్ట్రంలోనే అడుగుపెడతా అని చెప్పి పోయిన. పార్లమెంటులో తెలంగాణ బిల్లు పాసై, తెలంగాణ రాష్ట్రం ఏర్పడిన తర్వాతనే నేను తెలంగాణకు తిరిగి రావడం జరిగిందని గుర్తు చేశారు సిఎం కెసిఆర్‌. ‌మీ ముఖ్యమంత్రి ఇక్కడ చాలా కార్యక్రమాలు చేశారు. ఆయన జాతీయ రాజకీయాల్లో కూడా ఇదేరకమైన కార్యక్రమాలు చేయడానికి పార్టీని జాతీయస్థాయిలో విస్తరించారు.. మీ అందరి ఆశీస్సులు మీ ముఖ్యమంత్రికి ఉండాలని ప్రకాష్‌ అం‌బేద్కర్‌ ‌చెప్పారు.

వొచ్చే 2024 పార్లమెంటు ఎన్నికలల్లో రాబోయే రాజ్యం మనదే..మనదే..మనదే ఈ భారత దేశంలో అని సిఎం కెసిఆర్‌ ‌విశ్వాసం వ్యక్తం చేశారు. మన శత్రువులకు మింగుడు పడకపోవచ్చు. కానీ చిన్న మిణుగురు చాలు అంటుకోవాడానికి. మహారాష్ట్రకు పోతే నేను కలలో కూడా అనుకోనటువంటి, ఊహించనటువంటి ప్రోత్సాహం, ఆదరణ అక్కడ వొస్తా ఉంది. ఈ రోజు మహారాష్ట్రలో వొస్తున్నటువంటి ప్రజాదరణ, ప్రోత్సాహం..రేపు ఉత్తరప్రదేశ్‌, ‌బీహార్‌, ‌బెంగాల్‌.. ‌ప్రతీచోట కూడా వొస్తని కెసిఆర్‌ అన్నారు. ఖచ్చితంగా భారత దేశంలో మన పాలన వొస్తుంది. రేపటిరోజున తెలంగాణ దళిత బంధు దేశంలో మన ప్రభుత్వం ఏర్పడ్డ తర్వాత ఖచ్చితంగా ప్రతి సంవత్సరం 25 లక్షల దళిత కుటుంబాలకు అమలు చేస్తాం. అన్ని రాష్ట్రాల వారికి కూడా ఈ సదుపాయం అందుతుందని సిఎ& కెసిఆర్‌ ‌ప్రకటించారు. అంబేద్కర్‌ ‌కలలు ఇంకా నెరవేరలేదు. నెరవేర్చాల్సిన బాధ్యత మనందరిపైన ఉంది. వారి కలలు సాకారం కావాలె. ఆయన అనుకున్నటువంటి ఎన్నో విషయాలు సాకారమయ్యాయి. ఏదో ఒక ఒరవడిలో కొట్టుకొనిపోవడం కాకుండా, ఒక గాల్లో పోవడం కాకుండా ఎవరైతే నిర్ద్వందంగా నిజమైన శ్రద్ధతోని పేద ప్రజలను ఆశీర్వదించేవిధంగా పోతున్నరో వారికే మీ బలం అందాలె. మనం చీలిపోతే దెబ్బతినే ప్రమాదం ఉంటది. కలిసికట్టుగా ముందుకుపోతే విజయం సాధిస్తామని ప్రజలకు పిలుపునిచ్చారు. మన రాష్ట్రంలో ఇప్పుడు 50 వేల మందికి దళిత బంధు సదుపాయం అందింది. ఈ ఆర్థిక సంవత్సరంలో మరో లక్షా పాతిక వేల మందికి ఈ సదుపాయం అందబోతున్నది. దీనిని బ్రహ్మండంగా సద్వినియోగం చేయాలని నాయకులు, అధికారులందరినీ కోరుతున్నానని సిఎం తెలిపారు. దేశంలోనే ఎక్కడాలేనటువంటి అద్భుతమైన ఆదర్శమూర్తి విగ్రహాన్ని గొప్పగా తీర్చిదిద్దుకున్నందుకు గర్వంగా ఉంది.

ఈ సమయంలో ఈ అవకాశం నాకే కలిసి వొచ్చినందుకు నా జన్మ ధన్యమైందని సిఎం కెసిఆర్‌ ‌తెలిపారు. రాబోయే రోజుల్లో కూడా బాబాసాహెబ్‌ ‌బాటలో తెలంగాణ రాష్ట్రంలోనే కాదు, భారతదేశాన్ని కూడా సరైన మార్గంలో పెట్టడానికి చివరి రక్తపుబొట్టు వరకు పోరాటం చేయడం జరుగుతది. ఎక్కడకూడా రాజీపడే ప్రసక్తే లేదని సిఎం కెసిఆర్‌ ‌తెలిపారు. జై భీమ్‌ అనే నినాదాలతో సిఎం కెసిఆర్‌ ‌తన ప్రసంగాని ముగించారు. ఈ కార్యక్రమంలో ముఖ్య అతిథిగా ప్రకాశ్‌ అం‌బేద్కర్‌, ఎస్సీ అభివృద్ధిశాఖ మంత్రి కొప్పుల ఈశ్వర్‌,  ‌కౌన్సిల్‌ ‌ఛైర్మన్‌ ‌గుత్తా సుఖేందర్‌ ‌రెడ్డి, స్పీకర్‌ ‌పోచారం శ్రీనివాస్‌ ‌రెడ్డి, మంత్రులు కెటిఆర్‌, ‌హరీష్‌ ‌రావు, వేముల ప్రశాంత్‌ ‌రెడ్డి,  జగదీష్‌ ‌రెడ్డి, శ్రీనివాస్‌ ‌గౌడ్‌, ‌మహమూద్‌ అలీ, గంగుల కమాలకర్‌, ‌సింగిరెడ్డి నిరంజన్‌ ‌రెడ్డి, సబితా ఇంద్రారెడ్డి, పువ్వాడ అజయ్‌ ‌కుమార్‌, ఎ‌ర్రబెల్లి దయాకర్‌ ‌రావు,  సత్యవతి రాథోడ్‌, ఇం‌ద్రకరణ్‌ ‌రెడ్డి, మల్లా రెడ్డి, తలసాని శ్రీనివాస్‌ ‌యాదవ్‌, ఎం‌పీలు జోగిన పల్లి సంతోష్‌ ‌కుమార్‌, ‌కె. కేశవ రావు, బిబి పాటిల్‌, ‌పసునూరి దయాకర్‌, ‌వద్దిరాజు రవిచంద్ర, ఎమ్మెల్సీ పల్లా రాజేశ్వర్‌ ‌రెడ్డి,  ప్రభుత్వ విప్‌ ‌బాల్క సుమన్‌, ఎం‌పి ఎమ్మెల్యేలు రసమయి బాలకిషన్‌, ఆరూరి రమేష్‌, ‌గువ్వల బాలరాజు, మెతుకు ఆనంద్‌,  ‌స్థానిక ఎమ్మెల్యే దానం నాగేందర్‌, ‌తెలంగాణ వైద్య సేవలు, మౌలిక వసతుల అభివృద్ది సంస్థ కార్పొరేషన్‌ ‌కార్పోరేషన్‌ ‌ఛైర్మన్‌ ఎ‌ర్రోళ్ళ శ్రీను మహారాష్ట్ర బిఆర్‌ఎస్‌ అధ్యక్షుడు మానిక్కదం, ఆంధప్రదేశ్‌ ‌బిఆర్‌ఎస్‌ అధ్యక్షుడు తోట చంద్రశేఖర్‌, ‌బిఆర్‌ఎస్‌ ‌నాయకులు దాసోజు శ్రవణ్‌, ‌మోత్కుపల్లి నర్సింహులు, సీఎస్‌ ‌శాంతి కుమారి, డిజిపి అంజన్‌ ‌కుమార్‌, ‌సిఎం కార్యదర్శి భూపాల్‌ ‌రెడ్డి, ఎస్సీ సంక్షేమశాఖ ముఖ్య కార్యదర్శి రాహుల్‌ ‌బొజ్జా,  ప్రొఫెసర్‌ ‌లింబాద్రి, టిఎస్‌ ‌పిఎస్‌ ‌సి మాజీ ఛైర్మన్‌ ‌ఘంటా చక్రపాణి, బుద్దవనం ప్రాజెక్టు స్పెషల్‌ ఆఫీసర్‌ ‌మల్లెపల్లి లక్ష్మయ్య,  తదితర ఉన్నతాధికారులు, ప్రజా ప్రతినిధులు పాల్గొన్నారు.