ఇదేమి లోకం…ఇదేమి లోకం?
మానవత్వపు జాడ
ఇసుమంతైనా కానరాని
అమానుష లోకం.
ఆర్తుల్ని ఆదుకొనేందుకు
రెక్కలు కట్టుకొని
కొందరు అహరహం శ్రమిస్తోంటే,
ఈర్ష్యా, అసూయలతో
ఆ రెక్కలు నరికి
బాధితుల ఆశలు సమాధిచేస్తే కాని
విశ్రమించని జనులున్న
పరమ కిరాతక లోకం.
పాలనలో అ, ఆ లు రాకున్నా,
దురాశతో అందలమెక్క
పునాదులు లేని వాగ్దానాలు చేసి
పీఠ మెక్కి,
నిబద్ధత లేని నిర్ణయాలతో
బాధ్యతల పట్ల అంకితభావం
మచ్చుకైనా చూపని,
ఇచ్చిన మాట నిలబెట్టుకోవడం
వాగ్దానాలిచ్చినంత
సులభం కాదని తెలిసొచ్చి
తప్పులు ఎదుటివారిపై రుద్దే
కుళ్ళూ, కుతంత్రాలకు
స్వార్థానికి నెలవైన
వ్యక్తుల చేతల చేతులతో
నరకబడుతోంది
నేటి మానవత్వపు కల్పతరువు.
కుత్సిత మనస్తత్వం కలిగిన
ఓ నాయకులారా మార్చుకోండి
మీ మనసు గదులను విశాలంగా!
సర్వం త్యాగం చేసి
చిరస్మరణీయులైన నేతలూ
ద్వేషాల్ని జయించి
ఆర్తుల కోసం మళ్లీ జన్మించరూ!
– వేమూరి శ్రీనివాస్‌,9912128967
తాడేపల్లిగూడెం
