హలో!అన్నా! ఇయాల మూడు సావులు, రొండు బర్త్ డేలు,ఓ సంవత్సరీకం, టక్కరై కాల్జేతులు ఇరిగినోళ్ళు ఇద్దరున్నరు. దండలు,గిప్టులు గిట్న ఇంతెజాం జేశిన! మనం జర పొద్దున్నె యెళ్ళాలె! సరె గని! ఆ ఏరియా కార్పొరేటర్లకు ఫోన్ జెసి తయారై వుండవను…మనోళ్ళను జమజెయి! పోటోలు జర సరింగ తీయాలె!నిన్న ఎస్సార్ నగర్ ల ముసలోని పాడె గంతగనం మోశినగని ఎవడు సరిగ్గ పోటోనే తీయలె! ఇయాలన్న పోటోలు బాగ తీయాలె ! ఇనచ్చిందా! గీ ముచ్చటిన్నంక మీకే సమజయితాంది. గిదుల్లా! బతుకనేర్శినోళ్ళ పొద్దటిపూట పోన్ల బాతాఖానీ .. .. గిప్పుడు ముచ్చటేందంటె..మనూర్లె లగ్గంగానీ, సావు గానీ, యింకేదన్నగాని ఇంట్ల యెసొంటి కార్యమైనా ఆకిట్ల టెంటు గుంజుడాల్శెంలేదు.గంగిరెద్దులోల్లు జమయితరు.యేన్నుంచి యెరుకైతదో గని వురుకచ్చి ఆలుతరు. ఇప్పడో గమ్మతేదంటే ! గంగిరెద్దులోల్ల కన్న ముందు మన లీడర్లే రాబట్టె!తీరొక్క పార్టీ లీడర్లు పదిమందిని యెనుకేసుకోని యేకంగ లోపలింట్లకే వత్తాండ్లు. తొవ్వపొంటి టక్కరై కాలుజేతులిరిగి మంచమెక్కి ఎవలన్న వుంటెగీన,పుసుక్కున సావుల్లు గనుకైతే ఔ !ఏంది గింతగనం పేమలా!అనే తీర్గ కావులిచ్చుకునుడు, కండ్లల్ల నీరు కార్సుడు,యేడ్శే ఆడోళ్ళు ,మొగోళ్ళందరిని ఊకుంచుడు గిసొంటి రీల్స్ మస్తు కానత్తయి, సచ్చినోని యింటోళ్ళు సుత గంతగనం యేడ్వరుల్లా!గా తీర్గ బోరుమనేడిశే తీర్గ ఓదార్పులు జూశెటోళ్ళకు గింత దగ్గరి సు
ట్టం గిట్లనా అని పరెశానయితరు.పాలోల్లకన్న,దగ్గరి సుట్టాలకన్న జరింత యెక్కువనే ధైర్నం జెపుతరు. సచ్చినోల్ల పోట్వకాడ ఓ దండేశి దండం బెడ్తరు. సుట్టూత వున్నోళ్ళను పాతసుట్టమోలిగే పల్కరిచ్చుడూ,వంగి వంగి దండాలు బెట్టుడు జోరుగయితయి.యెంబడి గాళ్ళ పార్టీ మంది మార్బలం,జెండాలు సుత యెంబడుంటరు.” తమ్మీ ! యేమన్న సాయం”కావాలంటె కలువుమంటరు.లేకుంటె ఒక్క ఫోన్ గొట్టు సాలు! చేతులిన్ని పైసలు బెడ్తరు.కావిలిచ్చుకుంటరు కాసేపు కూసుంటరు. యెంబటచ్చినోళ్ళు పోట్వలు తీసుడైనంక లేశి దండం బెట్టి చిన్నంగ బయలెల్లుతరు.కార్లు తొవ్వ బడుతయి. లగ్గం గిట్న అయితాందనుకో…పదేశిమందితోని సటాసటా లోపలికచ్చి పిల్లాపిలగాడున్న స్టేజీ యెక్కుడే, జోబులకేలి కవర్ దీశి కట్నం జదివిచ్చుకుంట ఇకిలిచ్చి అలాయిబలాయి తీసుకుంటరు.ఓ దిక్కున పోట్వలు దీసుడయితేనేవుంటది.బస్తీల వూల్లెపొంటి ఎసోంటి పవోజనమైనా లీడర్లు పిల్వని సుట్టాలై సూరుబట్కయాలాడుతాండ్లు. వూర్లె యెవలింట్లైనా సరె పుట్టీన రోజులు, పురుడ్లు,సావులు ,దినాలు ,వారాలు యెసొంటి యైనా లీడర్లు యెమ్మెల్లే గ నిలబడె అన్ని పార్టీటోళ్ళు ఒకలెనుకొకలు గల్మలకచ్చి పల్కరిచ్చుడు గమ్మతి నడువబట్టె! గీ పల్కరిచ్చిన పోట్వలు సోషల్ మీడియాల ,తెల్లారి పేపర్ల కానచ్చె! మంది మార్బలం,యెనుక పొంటి పార్టీ జెండాలు,జీబులు,కార్ల వరుస లాయె!ధూంధాం లాయె!
కోళ్ళు పంచెటోళ్ళు ,కోటర్లు పంచెటోళ్ళు ఓ దిక్కు మోపయిండ్లు. టమాటలు పిరమయినయి గద! నుటాయభై రూపాలలకు కిలో ఛలో! అవిసుత ఇంటికిన్ని చిండ్లు. లొల్లిల లొల్లి ఈ నడుమ వానలు దంచి కొట్టినయి గద!గీళ్ళు జేశిన కతలు ,కబ్జాలకే మన తాన కాలనీలన్నీ శెరువులయినయి. నాలాలు ,శెరువులు బాజాప్త మింగి కూసున్నరు. ఇప్పడు గా లీ డర్లే వేషం మార్శి గల్లీలు మున్గిపొయిన కాలనీలు తిరి గిండ్లు. లీడర్లు అదిరిపోయే సెంటు, జోర్ దార్ బొట్లు కడక్ ఇస్త్రీ అంగీలేసుకుంటరు గద! కాల్వలనీళ్ళు కాల నీ యిండ్లల్లకు అచ్చినయి గద! మురుగునీటి తడిశి ఆ అంగీలు యెంతగనం యేడిశినయో! గీ ఓదార్పు బాగోతులాడే లీడర్లు ,శిత్రకతలువడే లీడర్లు యిన్ని దినాలు యెందుకు కాన్రాలేదో! యేందో! రాల్లానలు కుర్శి,వరదలచ్చి చేతికచ్చిన పంట కొట్టుకపోయినప్పుడు,పంట గిట్టుబాటు దర లేక రైతులు జీవిడిశినప్పుడు జంగ్లాతోళ్ళు మా పోడుబూములు గుంజుకున్నప్పుడు ఒక్కలంటె మా దిక్కెవరు జూశిన పాపానబోలే! ఓట్ల పండుగ దగ్గరైందని లీడర్లకు మేం యాదికచ్చినం!మా బతుకులు యాదికచ్చినయి.వున్న పళంగ మా తిప్పలు యాదికచ్చినయి. ఓట్లడిగే తీరు షాన్ గ మారిందుల్లా! గీ అలాయి బలాయిల యెనుక ఓట్ల మతులబున్నది. ఔ మల్ల! గీ కాలవంత బత్కనేర్శినోళ్ళదే! ఇసొంటి బత్క నేర్శినోళ్ళ ‘కతా కమామీషు’ గీ తీరుగుంటది. మొకం మీద అతుకుబెట్టుకున్న వినయం,మాటల మీద పైపైన ఎలిగేటి నవ్వు కొట్టత్తది. మాట సూడబోతె అలాయిలాయి తీరుంటది.మాట మైమరిపిత్తది.జానిజిగరు సోపతనిపిత్తది.మనల యెల్లెల్కల యెత్తేశేదాంక ఆదేపాటి ఇచ్ఛంత్రమో మన కెర్కగాదు. ఓట్ల పండుగొడిశేదాంక, మనకెరుక లేకుంటన్న మనల మాయంజేశేదాంక సుత ఆ మాటెనుకున్న నవ్వులసలు యవారమేందో.యెరుకగాదు.బత్కనేర్శినోళ్ళ జాడపత్త దేవులాడకుంట జప్పున దొరుకుతది.పజాసేవ ఆని జెప్పేటి నాయకులందరు “బత్కనేర్శినోళ్ళంటె” కిందుండె అభిమాన బకరాలు గరంగరమైతరు గని, గిదే సత్తెమంటె నమ్మాలె! యెందుకంటె అదే సత్తెం గాబట్టి!.ఔ! బతుకనేర్శినోళ్ళదే గీ దేశం! నిప్పాసొంటి మనిషి, నిజాయితీతోని,జీవితవంత పజాసేవకే అంకితం జేశి తిప్పలు పడుతాంటె మా నాయకుని మీద దుమ్మూ మన్నూ పోసుడేందుల్లా! అని కాల్జేతులిరిశే శాంతి కాముకులుంటరు.ఇసొంటి జైగొట్టే బత్తాయి గుంపులను గల్లిగల్లి నుంచి జిల్లాల దాంక కావలి బెట్టుకోవాలె!పాల పాకెట్లు కొరికి పోస్టర్ల మీద పోయాలె గద! పాలాభిషేకం వార్తలు మీడియాల రావాలె! పడేటి తిప్పలంటే అసొంటిసొంటి తిప్పలు గాదుల్లా! జనం పాదాలకు ముళ్ళుగీన గుచ్చుకుంటె మునిపంటి తోని తీశెటందుకు తయారుంటరు. గాళ్ళ కోసం గొంగలి పురుగును సుత ముద్దువెట్టుకుంటరు,కుష్టాది బీమారున్నా గని కావిలిచ్చుకుంటరు.మాట యిచ్చిండ్లంటె దాని కోసం మెడ కాయిమీదున్న తలకాయ సుత నరుక్కుంటరు.యాడాదికో వందమాట్లనన్న గిట్ల తల్కాయ నరుక్కోకుంటె ‘సుక్క’,నీల్లు సుత ముట్టరంటె నమ్మాలె! గింతగనం జెప్పినంక మీకెవలు యాదికత్తాండ్లో నాకెరుకలె గని,నేనైతె పద్మనాయక వంశ, కల్వకుంట్ల చంద్రశేఖర మారాజు, మన తెలంగాణ బాపు గురించి ముచ్చట జెప్పచ్చిన. తెలంగాణ రాజ్యం ఎనిమిదేండ్లు పాలిచ్చె!శిలుం బట్టి, నీల్లు లేక,కరంట్ లేక,సదువులు లేక,సదివినోళ్ళకు కొలువుల్లేక ఆగమాగం అడివడి వాసొంటి తెలంగాణ రాజ్ఞెం బంగారం రాజ్జెమనె!తంగేడుపూల పోరుబతుకమ్మ శృతి నెత్తుటి నిశానీ తోని మొదలైంది.ఆట,మాట,పాట బందు వెట్టిచ్చె! మర్లవడి తెచ్చిన తెలంగాణా రాజ్జెంల మర్లవడుడే నేరవయింది. సర్కారి సదువులు కొస పానంతోనున్నయి.అవ్వల్ దర్జాగుండేటి తెలంగాణాను అప్పులకొంపగా జేశె!యే జనం బెట్టిన నౌకరెక్కి “కల్వకుంట్ల”రాజ్జెమేలిండో ఆ జనానికి కల్వకుంట దూరం గాబట్టె! స్రజనం ఆకాంక్షల దివిటీ తెరాస.తెలంగాణ కలలు గన్న జనం గుండెసప్పుడు పేరు తెరాస.జీవిడిశిన వేలమంది అమరుల నెత్తుటి త్యాగాల సాలు పేరు తెరాస! దగా జేశిన బడాచోర్లమింక నమ్మబోవని జనమెత్తుకున్నరగల్ జెండా పేరు తెరాస!దొరల పెత్తనం మీద మర్లవడ్డ సాయుధ పోరు నాడు మోసపొయింది.యెనిమిదేండ్ల అద్దుబందుల తెలంగాణ నేడు అంతకంతకు దోపిడైంది. రేపటి సంది తెరాస పేరు కాన్రాకుంటబోతాండె! దొరా!తెరాస శిశువు పురిటి నొప్పులకాడ నీ జాడేడిది! పానంపోసుకోని తెరాస కెవ్వున తొలికేక పెట్టిన దినం నీ జాగేడిది!?ఇటేటు రమ్మంటె ఇల్లంత నాదంటివి.యేకు మేకైతివీ,యేలె రాజైతివి.నింగిన మెరిశే బుద్దిజీవులు జేశిన,ఆత్మత్యాగాలకు సమాధి గట్టి, జనం ఆకాంక్షలను తొక్కుకుంట కొత్త తోవ మాగనే జూసుకోబడ్తివి. ఏలినకాడ యేం రాంసక్కదనం జేశిండో యెరుకైం దేనాయె!కూట్లెరాయేరనోడు యేట్లెరాయేరబొయినట్టు!దేశాన్నుద్దరించచ బయిలెల్లిండని జనం అనుకోకుంటుం టరా!ఐదేండ్ల కిందోపాలి గిసొంటి కతలు మాగవడ్డడు.మూడో ప్రంట్ అని జెండ బటుక తిరిగి,అన్ని రాష్ట్రాల సోపతుల కలిశిండుగని మనిషి నమ్మకం దక్కువోడని యవారం జెడిపాయె! పూవు గుర్తోల్లు జేశిందానికల్ల తల్కాయూపి జై గొట్టి,తోక బట్టుకోని తిరిగె వుజురాబాదుల జెండెగిరినంక వాపు బలంగా కానచ్చి వురుకులాట పెంచుడాయె!సారేగన్క లేకుంటె మల్లన్న మారాజయ్యేది కాదా! దుబ్బాక దెబ్బ అబ్బా!అనిపిచ్చినంక బండ్లు ఓడలాయె! పూవుగు‌ర్తు తొడగొట్టుడు నేర్శి ముందుకు దుంకె!మాటిమాటికి ఓట్లపండుగల దెచ్చుడు జనంల బోయి తెలంగాణ ఉద్దెమం యాదికిదెచ్చి జనంను ఆగం జేసేటి విద్దె పూవు గుర్తోల్లు సుత నేర్శిండ్లు. మునుగోడు ల యెవలు మునుగుతరో,యెవలు తేలుతరో గని ఓటేశే జనం మళ్ళేపాలి ఓడిపోవుడే.”వంపయితె వొదినె,మిట్టయితె మరదల”న్నట్టు ఓట్ల పండుగ చ్చినప్పుడు ఉద్దెమపార్టీ అయితది,ఒటెంక రాజకీయ పార్టీ అయ్యేటి కతలు బందయినయి. దళిత బందు,పించన్లు,కరంటు ఓట్లకు మాగనే పురుడు బోత్తయన్న లెక్కలు బోర్లబొక్కలేశిపడేత్తయన్న సోయి లేకుంట బాయె!”చేయి” గుర్తు లేకుంట జేశి రాజకీయమనుకుంటెట్ల!దగ్గెర పట్ల శత్రువుయెవలనేది సరిగ్గ సమజ్ గాకపాయె! గీ ‘సందట్ల సడేమియా’ అనుకుంట దసరా పండుగోలిగె భారతదేశం పార్టీ బెట్టే పూన్కమచ్చె!తెలంగాణ ప్రాంతీయత పానంగ పుట్టిన ఉద్దెమ పార్టీ తెరాస పేరుకు బొంద వెట్టుడేనా!? “చేయి”గుర్తు లేకుంట జమగూడుడు, జంగ్ జేసుడు తమిళ తంబికే కాదు ,ఇంకొందరికి సయించదేమో! ఎర్రన్నల సాయితి పడితె దీదీ కాళికకు సుర్రు మంటది. ప్రాంతీయ పార్టీ బెట్టే పనిలున్న శంకర్ వాఘేలా గుజరాత్ దాటి దేశమంత తిరిగెటందుకు ‘ఊ!’ అంటడా ఆనే దింక తేలలే!ఉద్దవ్ పులిని సంకనేసుకుంటే విప్లవ కామ్రేడ్లకు పడదాయే! ఏ తిప్పలు లేకుంట బీహార్ వస్తాద్ నితీష్,కుమారస్వాములే యెంబడుంటరు. దేశం మీది రైతులు,యువత,విద్యార్థులు సమస్యలపై అద్దెయనం జేసుడు,తెలంగాణాతీర్గ సంక్షేమ దళిత బందు,పించన్లు అవన్నీ ఆసరైతయనుకుంటె అనుమానమే!పాలనల జనం మెచ్చుకునేటియి గిట్లుంటె ముందుబెట్టాలె!గని తెలంగాణా మంత్రాలకు దేశంమంత రాలేటియి తుప్పిర్లే!డిల్లీల రూపాయి అప్పు లేని సర్కార్,సదువులంటే డిల్లీ సదువులనే తీర్గ జేశిండు కాబట్టి పంజాబ్ లో కేజ్రీవాల్ ఎప్పుడో ఆయన పని జేసుకుపోబట్టిండు. ఇప్పుడు జాతీయ పార్టీ ఏషం గడ్తె గనుక పక్క రాష్ట్రాలతోని వున్న వున్న నీళ్ళ పంచాతులన్నింటికీ ఓ అడుగు యెన్కెకేయాలె!ఇటు జూడ బోతె యింకెవలైన తెలంగాణ పాటందుకుంటె యేడ మొదలయిన గాడ యేం మిగులకుంటయితది. అటు జూడబోతె జాతీయ పార్టీ అనేది మనవనుకునేది కాదుల్లా! కొత్త పార్టీకి కెసిఆర్ జాతీయధ్యక్షుడైతె గావచ్చు గని అది జాతీయపార్టీ ఇప్పుడైతె గాదు. తెలంగాణల పార్టీ బెట్టింది ప్రజలే! దానిని నిల్పుకున్నది ప్రజలే! ఓట్లేశింది ప్రజలే! జనం ఆకాంక్షల పునాదుల మీంకేలి నిర్ణయం తీసుకోనుండె! వంద కోట్ల బెట్టి కొనేటి గాలిమోటర్కు వెయ్యి కోట్ల రూపాలు జమయినంటె రేపురేపు దేశమ్మొత్తంమీద జమయ్యేటి ఎవలిపాలయితయో!మీడియా, దినాం కతలు పడెటందుకు అప్పుడే ముప్పయికోట్ల రూపాల ముల్లెలు పయనమైనయి. దేశమంత సోషల్మీడియాల కతలు రాశేటందుకు చేయి తిరిగిన రాతగాండ్ల ఎంపికలు షురువైనయట.తెలంగాణ రాజ్జాన్ని నట్టేట్ల ముంచి నమీబియా జేశినంక దేశాన్నేపాటి “అర్సు”కుంటడో సూడకపోతమా! “కన్నతల్లికి బువ్వ బెట్టనోడు,చిన్న తల్లికి కమ్మలు జేయించిండట”అంటె గిదేనుల్లా!
-ఎలమంద
